രണ്ടിടങ്ങളിലായി എക്സൈസ് നടത്തിയ പരിശോധനയിൽ വൻ കഞ്ചാവ് വേട്ട

തിരുവനന്തപുരം / മലപ്പുറം: സംസ്ഥാനത്ത് രണ്ടിടങ്ങളിലായി എക്സൈസ് നടത്തിയ പരിശോധനയിൽ 11.5 കിലോ കഞ്ചാവ് പിടികൂടി.
തിരുവനന്തപുരം കാട്ടാക്കടയിൽ കേരള എക്സൈസ് മൊബൈൽ ഇന്റർവെൻഷൻ യൂണിറ്റ് നടത്തിയ വാഹന പരിശോധനയിൽ കാറിൽ നിന്നും 4 കിലോഗ്രാം കഞ്ചാവ് കണ്ടെടുത്തു. കഞ്ചാവ് കടത്തിക്കൊണ്ട് വന്ന രാജീവ്(57 വയസ്സ്), അനൂപ്(35 വയസ്സ്) എന്നിവരെ അറസ്റ്റ് ചെയ്തു.

വാഹന പരിശോധന നടത്തുന്നതിനിടെ കൈ കാണിച്ച് നിർത്താതെ പോയ കാറിനെ പിന്തുടർന്ന് തടഞ്ഞു നിർത്തി കഞ്ചാവ് കണ്ടെടുക്കുകയുമായിരുന്നു. തുടർന്ന് പ്രതികളെയും പിടികൂടിയ കഞ്ചാവും നെടുമങ്ങാട് എക്സൈസ് ഇൻസ്പെക്ടർക്ക് കൈമാറി.

മലപ്പുറം ചേളാരിയിൽ 7.5 കിലോഗ്രാം കഞ്ചാവുമായി യുവാവിനെ എക്സൈസ് അറസ്റ്റ് ചെയ്തു. ചേളാരി സ്വദേശി ഷണ്മുഖ ദാസൻ(38) ആണ് പിടിയിലായത്.

പരപ്പനങ്ങാടി എക്സൈസ് റേഞ്ച് ഇൻസ്‌പെക്ടർ കെ ടി ഷനൂജിന്റെ നേതൃത്വത്തിലുള്ള സംഘവുമാണ് കഞ്ചാവ് പിടികൂടിയത്. കഞ്ചാവ് കടത്തുന്നതിനായി ഉപയോഗിച്ച യമഹ സ്കൂട്ടറും കസ്റ്റഡിയിൽ എടുത്തു.